Heb 3 | MMX | STEP | Luvutnetak mi luvurinuk. Nemi bok lavaanat soxolik at ne Moroa mo ga ro ka vam nimi ngan limixin teren. Kuren la mo levempanga ne Iesu gak lox i, ni na veve mam pixan amisik tidik. Iesu, neni Luun Pavang la Lamaasa Gomgo. La na nedik dira nuunu ren.

Hebrews 3

Iesu I Silok Ti Ne Moses

1 Luvutnetak mi luvurinuk. Nemi bok lavaanat soxolik at ne Moroa mo ga ro ka vam nimi ngan limixin teren. Kuren la mo levempanga ne Iesu gak lox i, ni na veve mam pixan amisik tidik. Iesu, neni Luun Pavang la Lamaasa Gomgo. La na nedik dira nuunu ren. 2 Neni ga ruturun ti ne Moroa mo ga soxolik ka i ri lugugu ren, kerekngan ne Moses ga ruturun ap mo levenaleng neni gak lok tatao limixin at ne Moroa. 3 La ne Iesu ga ruuna ka laasen i silok ti ne Moses, kerekngan mun laradi gugu gu, neni i ruuna laasen silok ti mo loogu neni i lox i. 4 Na i ruturun mila levenabung mixin getgesara di ruuna lara laradi ga lok li di; ketla ne Moroa ga lok li levempanga axap. 5 Moses ga ruturun ngan laradi gugu ri lok tatao limixin at ne Moroa la neni ga paase asu levempanga ba vot melemu. 6 Ketla ne Karisito i ruturun at lugugu ri lok tatao limixin at ne Moroa xerekngan lanarong i lok tatao libibinat teren. Do atam tebeng lolos lunuunu atdik la tana ngangais mi lomomo ri lomlong teren, i lox asuusu i do nedik limixin at ne Karisito.

Loklok Mamana Ri Limixin At Ne Moroa

7 Nedik limixin at ne Karisito, kuren la nemen mita ronga xepe levelinga ren. I ngan levelinga at Lovoang Kaala, Loroonan Kaala ga vaase i xeretna,

“At na loxonaleng do mina ronga levelinga at ne Moroa, 8 nemen gat mita lox alolos lebelen nimi xerekngan lavalabat atnimi diga ronga xepe ne Moroa ap mo levenaleng ne Moroa ga lok tong pen lunuunu atdi ro at lamatbin.” ^a

9 La ne Moroa ga lok keretna,

“Lavalabat atnimi diga lox amusax ia ro at lamatbin, la at lavanuet sangaun maares diga ven levempanga sangsangu nenia aga lox i. 10 Ana i lavasuun teren la nia aga belemamao limixin ap mo loola. La aga lok, ‘Lebelen di i onon petpes amisik basinge ia, la kopmen ta dinaklen leventaangas tarak.’ 11 Kuren la aga vangpe at lumukmusak tarak do, ‘Di noxo vubeles tinotno at loxot loklok mamas tarak kusu dina rooro avukat.” ^b

12 Luvutnetak mi luvurinuk. Mina lok tatao avukat nimi xusu tara atnimi noxo ruuna taxakapmek la loklok ting tonga xepe levelinga at ne Moroa xeneng at lorooro ren, la kerepmo na sok tixirixes kepe ne Moroa, mo i rooro. 13 Ketla at na levenaleng nemi move mi rooro ren, mina epang aru xusu laxakapmek noxo solo arup tara atnimi la lebelen na repe ri levelinga at ne Moroa. 14 Nedik tabat kis esogo mi ne Karisito do nedik tam tebeng lolos lunuunu se at laxavaxap at lorooro atdik, kerekngan nedik taga nuunu ruturun ap mo levenaleng taga lok kaka lunuunu maxat. 15 I lok ngan Lovoang Kaala i tong i do,

“At na levenaleng do mina ronga levelinga ren, nemen gat mita lox alolos lebelen nimi xerekngan nedi lavalabat atnimi diga ronga xepe ne Moroa.” ^c

16 Nege di nom diga ronga laxaka at ne Moroa la melemu diga ronga xepe i? Nedi mo limixin me Israel, ne Moses ga lam asu ka di boro Isip. 17 At lavanuet sangaun maares diga lok laxakapmek la diga raba arulu ne Moroa. Kuren la ne Moroa ga musak di la buaang atnedi diga remet eteke mun to at lamatbin. 18 La ne Moroa ga vangpe do di noxo vubeles tinotno ri mo loxot loklok mamas teren, mila diga ronga xepe levelinga ren. 19 Kuren la nedik di ven i do buaang atnedi di goxo lox epovo i xusu dina vubeles mila di goxo nuunu at ne Moroa.